A Pol data a bʋʋda Rom tẽnga

1. A Festus sẽn ta Sezare tɩ rabitẽ, a yii n tuda Zerizalɛɛm.
2.  A sẽn ta la maan-kʋʋdba kãsem-dãmba la tẽnga nin-bɛdã sẽn yeel tɩ b boonda a Pol bʋʋdo yẽnda taoore. B sẽn wilg b raabã,
3. B kos-a lame wala bűmb sẽn na n yãng b zooda ne taaba, t'a sõng t'a Pol lɛɛg n wa Zerizalɛɛm. Ra yaa bẽdgo la b gãneg yã n na n paam-a n kʋ sorẽ.
4. A Festus leok-b lame t'a Pol tog n paa Sezare la yaa be la yẽ meng lebd mars-marsã.
5. A paasame: «Neb niyns sẽn tõe n kao bʋʋdo n be yãmb sʋka, wa tɩ d loog. B sã n yet tɩ yell be a zugu, b na bool-a bʋʋd Sezare.»
6. A Festus maana dasem a nii bɩ piig bala n yaool n leb Sezare. A sẽn vẽeg beoogo, a kẽe bʋʋda zĩigẽ la a kɩtame tɩ b bool a Pol.
7. A sẽn wa, Zʋɩf niyns sẽn yi-b Zerizalɛɛma gűbg-a lame n dogend a zugu, yɛl sẽn waooge la sẽn ya tagdo, b mens sẽn ka tar kaset t'a sɩd maaname ye.
8. A Pol da kɩɩsdame n yetẽ: «M ka ne m sẽn tõdg Zʋɩf rãmba noor ne bűmb ning ye, m ka paoog wẽnd doogã, m ka paoog Rom naaba ye.»
9. A Festus tʋlgame n noog Zʋɩf rãmba sűuri n leok a Pol woto: «Fo ratame n leb Zerizalɛɛm tɩ b kao rẽ fãa bʋʋd mam taoor bɩ?»
10. T'a Pol yeele: «Yaa Rom naaba bʋʋd la b na n bʋ maam; dẽn yĩnga yaa ka, pa Zerizalɛɛm ye. M ka maan bűmb sẽn wa ne Zʋɩf rãmba bõne, la y meng mii rẽ neere.
11. M sã n sɩd kongame, m sã n maana bűmb sẽn tog ne kűum, m saka kűum. La nin-bãmba sẽn togsda sã n ka sɩda, ned ka be sẽn tõe n dɩk maam n bas b nugẽ ye. Bɩ m bʋʋda yɩ Rom naab taoore!»
12. A Festus yãenda a sagendbã n yaool n yeel a Pol: «Ka Rom naab taoor la f rat tɩ b bʋ-f laa? Bʋʋda na yɩ Rom.»